..+[آه من خلي .. أسري على صوته وأهاذيبه.. جديد ( السولعي ) العيناوي حمد]+..

العيناوي حمد · 15-04-2005, 04:04 PM

السالم عليكم

شحالكم الشيوخ..

اليوم ياينكم بقصه يديده .. طبعا من تأليفي..

وما زال جاري الكتابه فيها ..

وا ن شاء الله تعيبكم..

خويكم

العيناوي بو شهاب

.
.
.

سهيل : اميييييييييييييييييييييييييييييييييه يا اميه ( وهوه نازل من الدري و يلبس نظارته الشمسيه)
وتطلع له سلامه من فوق
سلامه : اميه محد..
سهيل : ياربي وين سارت ؟؟
سلامه : سارت ويا خالتيه تسلم على حرمه يايه من العمره ..
سهيل : ( يرفع نظارته ويحطها على راسه ) يا هي حاله .. انزين انا قايللها تطلع من فلوسي خمسميه .. عطج اياهن عسب تعطيني ؟؟
سلامه : امممم لا ..
سهيل : يا الله .. ويقبظ التلفون ويتصل لأمه ..
سهيل : اميه وين فلوسي؟؟
ام حمد : العرب تسلم قبل .. فلوسك بتلقاهن تحت الزوليه اللي فحجرتي
سهيل : هيه انزين اوكيه .. يالله فداعه الله
سلامه : هيه بلاك مستعيل
سهيل : انتي جب .. انتي آخر وحده ترمسين
سلامه : بسم الله بلاك انته.. انا شو سويت؟
سهيل : وانا قايل حق منو يوعيني العصر ..
سلامه : ( تظرب يبهتها ) والله نسيت ..
سهيل : نسيتي لا .. ويقبظ كرتون الكلينكس اللي كان على الطاوله ويفره فوق .. وتربع سلامه وتشرد .. ولسوء حظه يرد الكلينكس مره ثانيه ويطيح على راسه ..
سهيل : آآآآخ .. انا شو ياايني اليوم منحووس .. من نشيت لين الحين .. افففف
سلامه : الحمد لله والشكر توك تدري انك منحوس؟؟
سهيل : هاي اللي بتخليني اظربها اليوم ( ويسوي عمره يروغها )
ربعت سلامه حجرتها وقفلت الباب .. وسار سهيل حجره امه وطلع الفلوس وركب سيارته .. ويوم توها بيشغلها .. اختربت .. ويظرب راسه على السكان ...
سهيل : اففففففف شو هالنحاسه .. شو مستوي اليوم ..؟؟
وشوي يصيح تلفونه ..
سهيل : مرحبا
حميد : مرحبتين والله وينك يا ابويه .. ليش تأخرت .. المدير يتخبر عنك ..
سهيل : اسكت الله يخليك .. السياره اختربت .. سير قول للمدير اني ياي .. وقوله سيارتيه اختربت وانا بدبر سياره ..
حميد : تباني أييك..
سهيل : لا يا ابويه .. باخذ سياره البيت وبيي ..
حميد : اوكيه.. اترياك
ويبند سهيل عن حمد
ويسير صوب الدريول وياخذ السويج ويسير الدوام ..

وفي الدرب خطف على الشيشه واشترى له شيء ياكله لانه ما تغدى وبالمره صب بترول للسياره وعقب روح .. والحين باجي عن الدوام تقريبا 3 كيلو .. عاد اهنيه حس سهيل ان السياره فيها شيء .. وقفها على طرف الشارع .. وشوي انها ..... تبند .. ويظرب سهيل بكف ايده على السكان ..
سهيل : يعلج فيها .. شو هالحاله .. شو هالنحاسه اللي صابتني اليوم ..
وشوي ان دوريه شرطه توقف عنده .. وينزل الشرطي وربيعه ..
الشرطي : ها يا حبيب الشعب .. شو بلاك ..
ربيعه : هههه شو يالس اتسوي انته ..
ويسلم سهيل عليهم ..
سهيل : اسكتوا الله يخليكم .. والله لو أقولكم شو استوى بي اليوم بتهلكون عليه من الظحك ..
علي : لا تقول ولا شيء .. انته الحق على المدير .. مفوّل عليك .. يدورك دواره ..
سهيل :علوووه .. احلف ..
سالم : صدق ... تلاحق عمرك ..
سهيل : يا خي السياره اختربت عليه كيف اسير الحين ..
علي : من بعده المركز .. سر امش ونحن بنودي سيارتك التصليح ..
سهيل : احلف بس .. شرطي ومتكشخ ولابس بدله الشرطه وأمشي في الشارع شرات الأهبل ..
سالم : انته ما تبغي تسير مشي عسب لا يشوفنك المزايين ويقولن شو طوله ويمشي بليا سياره .. لا وشرطي بعد هههههه
سهيل : ههههه ظحكتني .. شدراك ..
علي : اركب اركب .. بنوصلك لين اللفه وانته مناك امش ..
سهيل : يالله انزين .. بس اصبر بييب تلفونيه
ووصلوه المركز ..
دخل سهيل المركز شوي شوي .. وخطف جدام مكتب المدير شوي شوي وشاف الباب مفتوح والمدير منزل راسه يوقع على ورقه .. اغتنم سهيل الفرصه ومشى ..
المدير : سهيل ..
سهيل يرد و يدخل على المدير .. ويظربله تحيه سلام
سهيل : نعم
المدير : خير ان شاء الله شو أخرك؟
سهيل : ( وقاله السالفه )
المدير : الله يهداك .. جان قلتلنا ونطرشلك دوريه تييبك ولا جان سوييت وخذت اجازه دام ان ما في مواصلات
سهيل : اسمحلي.. نسيت ..
المدير : ههههههه .. يالله توكل الحين .. وأبغيك تاخذ وياك حميد وتسيرون وتاخذون لفه على المرموم والشعابي اللي هناك لين الساعه ثمان واتردون ..
سهيل : ان شاء الله ..
ويطلع سهيل من المكتب ويسير مكتبه اللي في نفس مكتب حميد واثنينه بعد .. ومحد كان موجود غير حميد والباجيين طرشوهم دوريه ..
ويوم توه ياي يدخل تظرب ريله حد المكتب ..
سهيل : آآآآآآآي .. الله يلعن هاليوم ..
حميد : ههههههههه ايه لا تلعن هب زين..
سهيل : شو تبغيني أقول .. والله من الظيجه اللي فيّه ..
حميد : انزين شو قالك بو عبدالله ..
حميد : ما قال شيء .. وانتوا اونه مفوّول ويدورك دواره ..
حميد : ههههههههههه أكيد هذا علوه قايللك جيه ..
سهيل : وفي غيره ..
حميد : ههههههه
سهيل : انت خل عنك هالضحك ويالله قم
حميد : يالله ..
سهيل : وانته اللي بتسوق .. ما اروم عقب هالضربه ..
حميد : انزين ..قم قم ..خلنا نسير
سهيل : يالله

طلعوا حميد وسهيل وركبوا السياره ووويوم توه حميد بيشغل السياره .. بندت ..
سهيل : بدا شغل النحاسه بدا ..
حميد : لا بدت ولا شيء ( ويرد ويشغلها مره ثانيه .. واشتغلت )
سهيل : أشواااااااا

ويروحون يكملون شغلتهم .. وفي العين ..
خلود : اييييييه لا تبدلين خلي الفلم ..
سلامه : سيري ولي .. عنبو فلم من ثلاث ساعات ولا خلص
خلود : ليييييش انتي جييييييييه ؟؟
سلامه : والله ان ما سكتي لا أعظج في ايدج..
خلود : وانتي دومج إلا تعظين .. ياهل انتي؟؟
سلامه : واااااااااااااااااحد .. اثنييييييييييييين .. ثلاااااااااااااااااااااااااااااااااااااااثــ ــ ــ ــ ــ ـ ـ
وتقوم خلود ..
خلود : ما عاليه .. انتي شوفي اللي تبغينه الحين وانا فليل بستلم هالتلفزيون .. ويا راسج
سلامه : ( وهيه تبدل ) سييري سيري الله يخليج ..

(( خلود وسلامه خوا ت.. وعندهن اخت اصغر منهن اسمها لطيفه .. .. خلود عمرها 17 .. وسلامه في الجامعه سنه ثالثه .. ولطيفه ام سنتين ودلوعه سهيل ... وعندهم بعد اخوان اثنينه غير سهيل .. سهيل عمره 23 .. خالد توأم خلود يعني عمره 17 .. و حمد وعمره 26 ويشتغل في الهجره والجوازات .. وخاطب بنت عمه ظبيه ... ))

سهيل : يااا بوووويه اخطف ..
حميد : يعني لازم شيشه ... بخطفك على هالدكان ..
سهيل : لا .. انته ما تعرف اني عنيد .. تستهبل أونك ؟؟
حميد : شيء من هالقبيل .. يا بو عناد ..
سهيل : اخطف يا حبيبي يالله ..
حميد : أوكيه بس على شرط
سهيل : واللي هووه ؟؟
حميد : تسوق بدالي..
سهيل : (يحرك ريله مكان الظربه) .. امممم اوكيه
ويخطفون على الشيشه .. وينزل سهيل .. وشوي أن حميد يلحقه
تم حميد واقف صوب المجلات يتمنظر فيهن ..
وعقب عشر دقايق يطلعون ..
وفي السياره :
حميد : احلف انته بس.. هالصدعه كلها عسب فيتامين سي وسنكرس ..
سهيل : وما يستاهل يعني ؟؟
حميد : تبغي الصراحه .. لا .. يوم قلت بخطفك الدكان ..
سهيل : لا .. غير يوم يشوفنك البنات وانته في الشيشه .. هب في الدكان ..
حميد : قول جيه من البدايه ..
و يوم دخلوا المرموووم .. وكانت الساعه 7 المغرب ..
سهيل : ها شو رايك ؟؟
حميد : والله ما أدريبك .. أن أشوف سيارتك ما فيها شيء ؟؟؟ بعدها يديده ..
سهيل : بس ظارب خاطري في هالسياره ؟؟
حميد : الشور شورك .. بس لو تبغي رايي .. الاستيشن تعيبنيه أكثر عن النيسان الفتك ؟؟
سهيل : وانا رايي العكس ..
حميد : أقول بو عناد ..
سهيل : نعم ؟؟
حميد : انته اللي تباه بتسوييه ... لو مليون قالك لا بتعاند وبتسوي الشيء اللي بغيته .. سو اللي تبغيه ولا تاخذ راي حد ..
سهيل : ههههههه .. لهالدرجه أنا عنيد ؟؟
حميد : وأكثر..
سهيل : هههههـ.........( ويسكت )
حميد : بلاك ؟؟
سهيل : ما شيء .. بس شوف هذا اللي يساير بالراف الحمرا جدامك؟
وفي السياره ...
الولد : احين ان قالت الشرطه شيء انتي السبب ..
البنت : امش امش .. ما بيقولون شيء لاننا نمشي على طرف الشارع ..
الولد : ويالغبيه عسب جيه بيخالفونا ..
البنت : ما عليك ..
ويظرب سهيل لهم اشاره ....
الولد : هااه شفتي .. كله منج ..
وينزل سهيل ووياه حميد ..
والبنت تغشت .. والولد تم يتنافض محله ..
سهيل + حميد : السلام عليكم ..
البنت +الولد : وعليكم السلام والرحمه ...
سهيل : ( استغرب من ان الولد صغير ويعطيه عمر 16 ومستحيل يكون عنده ليسن ) ممكن الليسن ؟؟
هنيه النفضه زادت ..
الولد : مـ ــ ـا عند ددي ليـ ــ ـسن..
حميد : عيل ليش تسوق وانته ما عندك .. ؟؟
البنت :اسمحلنا الشيخ .. بس أنا اللي قايله لاخويه يطلعي شوي .. لاني كنت متظايجه وكنت أبغي أي حد يحوطني ..
سهيل : اوكيه ختيه .. قلنا حوطي بس مب مع اخوج اللي ما عنده ليسن ..
البنت : عااد اسمحلنا .. نحن لاهب مسرعين ولا نساير في نص الشارع ..
حميد : اسمحيلنا الشيخه .. بس لازم نتخذ الاجراءات اللازمه ..
البنت : ( بصوت عالي شويه .. + من الظيجه اللي فيها +) بس يا خوووويه .. قلنالك اسمحلنا .. لا تكبرها وهيه صغيره..
الولد : خلاص الشيخ .. اسمحلنا ..
عاد هنيه حس سهيل بتأنيب الظمير ..شاف ان البنت من الله متظيجه وهوه وحميد يزيدونها ..
سهيل : ما عليه .. نحن هالمره بنسامحك يا .. شو اسمك؟؟
الولد : اسمي المر ..
سهيل : انزين . هاااه .. انا عرفت اسمك الحين .. ان وصل المركز .. شو تبغيني أسوي ؟؟
المر : ههههههه سو اللي تبغيه ..
سهيل : كم عمرك ؟؟
المر : 17 ..
سهيل : العمر كله .. يالله.. عقب سنه بسمح اسمك يزور مركزنا ومن قبله .. لا .. اوكيه ؟؟؟
المر : اووكيه ..
سهيل : رمسه رياييل ؟؟
المر : رمسه رياييل ..
سهيل : تسلم .. يالله الحين توكل و هالله هالله فالسواقه ..
المر : ان شاء الله ..
سهيل : واسمحيلنا الشيخه جان ظايجنابج ..
البنت : مسموح ..
المر : يالله .. فمان الله ...
سهيل : فمان الكريم ..
ويروحون قوم المر ..
ويرد سهيل ويوم ركب السياره ..
حميد : انته خبيل .. انته تدري لو درا المدير شو بيسوي ؟؟
سهيل :.........................
حميد : طبعا بتسكت ..
سهيل : ياخي لاتكبر السالفه ... خلاص ما استوى شيء...
حميد : ما استوى شيء ؟؟ يالله يالله .. ردينا المركز .. وصلت الساعه 8 ..
سهيل : يالله ..
وطول الدرب وسهيل حاط فخاطره من اللي سواه اليوم ..

(( سهيل من النوع اللي ما يزعل أبدا ... وما يزعل الا على الشيء اللي يستاهل ... ومن عادته بعد انه ما يداني يجرح حد .. صغير كان ولا كبير ..واذا جرحهم يحس انه هوه اللي انجرح .. ويتم متلوم طول الوقت لين ينسى السالفه ))

حميد : اوهوووه يا سهيل .. والله ما يسوى عليك .. هيه شكلها ملبق ( كبريت ) بسرعه تتضيج ..
سهيل : أقول حميّد .. شو رايك تسكت ؟؟ ولا أقول ما يحتاي ... وصلنا ..
حميد : هههههههه هاذيه السياره يابوها لك ..
سهيل : ( بدا ينسى السالفه ) زين والله .. سووا خير فيه هالسالم والعلي ..لغير وين بيسيرون عني.. ولا هاي سواه يسوونها فيه .. اونه المدير مفوّل .. بيشوفون ....
حميد : عليك ابهم .. يستاهلون ... اسميهم ما يستحوووون يوم انهم يسووبك جذيييه ..
سهيل : هيه صح .. ما يستحون ..
حميد : عااد انته ما تصدق حد يمدحك .. انزل يالله انزل ..
سهيل : هههههه نزلنا ...
وعلى الساعه تسع وفي البيت .. بيت سهيل ..
ام حمد : عنود .. سيري اتطالعي اختج .. جانها تعشت هاتيها برقدها ..
عنود : ان شاء الله اميه ..
ام سهيل : سلاامه ..
سلامه وهيه تطالع التلفزيون : نعم اميه ..
ام حمد : سيري غناتي وسوي لخوج وطالعيه جان يبغي عشا ولا لا ...
سلامه : أي واحد منهم ...؟؟
ام حمد : وحد غير سهيل .. خالد وحمد فديتهم دومهم يتعشون هنيه ..
سلامه : ان شاء الله
ام حمد : ان شاء الله وانتي بعدج يالسه .. نشي ..
سلامه : انزيييييين

وشوي انا بو حمد يدخل ..
بو سهيل : السلام عليكم
خلود +سلامه + ام حمد : وعليكم السلام
خلود : مرحبا والله بنور البيت ... توه انور المكان ولا امبونها مبنده الكهربا
ام حمد : ياللوتيه ومن الصبح يالسه تسمعيني هالرمسه وتردين تسمعينها لبوووج
خلود : ههههههه صدق انزين
بو حمد : واااابوويه عليج انتي.. شيء تبغين ولا ما بترمسين هالرمسه ...
خلود : والله ما كان ..
بو حمد : هيه مدام جيه بنمشييلج الرمسه ..
خلود : هههه أسميك يا بويه سوالف ..
بو حمد : أعجبج يا بنتي .. ام حمد ...
ام حمد : عونك ...
بو حمد : عيل وين عيالج ؟؟
ام حمد : الحين بييييييون ..
بو حمد : وسهيل ؟؟
خلود : ههههههههه جيه ابويه .. وسهيل هب من ضمن العيال ..
بو حمد :وابوويه عليج .. تراه ولدي بعد لاكن أتخبرها جان بيي ولا لا ..
خلود : ههههههه أدري ..
وشوي أن سهيل يدش عليهم ..
سهيل : السلام عليكم ..
الكل : وعليكم السلام ...
خلود : لا لا .. سهيل موجود عندنا في البيت وبالتحديد في هذه الساعه .. مستحيييييل
سهيل : هاهاها ... ( وييلس عدال ابوه ) حمدي ربج انتي ..
وشوي ان سلامه تدخل .. وما انتبهت لسهيل ..
سلامه : يقولج سهيل ما يبغي عشى وهوه بعيد عن البيت ...
سهيل : وشو قالج بعد ؟؟
سلامه : ما شيء .. بس قالي ما يبغـ.... سهييييييييييييييييل .. انته هنييييييييه
سهيل : لا شبح جدامج ...
خلود : شبح ولا نيسان هاهاها
سهيل: هاهاها سخيفه .. اميه متى بتحطوووون العشى .. تراااني ميت من اليوع ...
ام حمد : فديتك غناتي .. اصبر شوي الحين بييبونه ..
خلود : هيه هييييه هييييه .. هذا غناتي .. وانا اللوتيه ..
سهييل : انتي اللوتيه ؟؟
خلود : شفت عاد ..
سهيل : ما يابوا شيء يديد .. لوتيه ونص ..
خلود : حلفوا بس .. كلكم ضدي .. انتوا ليش تكرهووووني ؟؟
سهيل : من الله حبيبتي .. شو نسوي بعد ..
خلود : جاااااااااان أزعل ..
سهيل : وجان بالطقاق ..
خلود : سهيلوووو بلاك عليه اليوم ..

وشوي أن عنود تدخل ووياها لطيفه
سهيل أول ما شاف لطيفه فج ايده لها .. وهيه طبعا دايركت ربعت صوبه ..
سهيل : فدييييت اللطف أنا ...
لطيفه : بابا ......

بوحمد : يعل بابا يفدى هالعوينات ....
خلود : بابا ...
سهيل : وحطبه ..
خلود : انا زقرت ابويه ..لا تتدخل لو سمحت ..
بو حمد : سهيل شو ياينك على اختك اليوم ..؟؟
سهيل : ماشيء يعلني أفداك ..
وشوي أن خالد يدخل ....
خالد : السلام ..
الكل : وعليكم السلام ..
خلود : واااابويه عليك .. ما تروم تسلم مثل الناس ..
خالد : لا ما أروم..
ام حمد : جييه وين حمد عنك .....؟؟
خالد : خطفني وقالي أقولكم انه معزوم عند ربيعه ...
بو حمد : يا حيه ..

وتعشى الكل وبعده الكل سار يرقد .. ما عدا ... سهيل اللي تسبح وعقب رقد .. وخلود وسلامه اللي يشوفن الفلم ...و خالد اللي قبظله شغله وسار يغسل النيسان في الحوي ..
(( النيسان سياره ابوه الجديمه ..حاليا بو حمد عنده استيشن بيضا ... والنيسان ما هان عليه يبيعه لانه وايد يعزه .. فعسب جذيه مخلنه في كراج البيت ... وخالد الله يطول بعمره .. خاطره فالنيسان .. فعسب جذيه كل اسبوعين يغسله مره .. الله يعطييك على قد نيتك يا خالد !! ..))

المهم .. خلوني أوصف لكم حال خالد عسب تعيشون وياه اللحظه ..
خالد حاسر ايده ورافع كندورته ورابطنها عند خصره ... والغتره فارنها على السياره اللي عدالها وهيه سياره البيت... سار خالد وياب الفوز ( بيب الماي ) من آخر البيت وسحبه لين السياره .. وياب سطل وحط فيه ماي وصابون .. وياب اسفنجه حق الغسيل .. وفوووده للعج .. هييييه صح نسيييت أقولكم شيء .. متعود خالد كل ما يغسل السياره يزقر اخته وتويمته خلود عسب تغسل وياه ... لان خلود ما شاء الله عليها شاده حيلها في هالاشياء .. وهوه يغسل السياره فليل عسب يكون متأكد ان الدريول راقد .. عسب اخته تاخذ راحتها وهيه تشتغل ...

دخل خالد البيت وسار فوق .. وشاف سلامه وخلود مندمجات وايد في الفلم ...
خالد : خلود
خلود :..........
أكره شيء عند خالد ان يرمس حد والتلفزيون شغال ... وما قصر .. سار صوب التلفزيون ويبنده ...
خالد : خلود وصمخ ما تسمعييييييين ...
خلود : هاه ... شو تبا .. يعني لازم تبند التلفزيون ؟؟
خالد : هيه لازم ..
سلامه : خويلد عاااااد .. انتي تبغيها .. انزين .. أنا شلي ؟؟؟
خالد : اليوم شو ؟؟؟
سلامه + خلود : الاربعا .....
وتذكرت خلود سالفه السياره ..
خلود : خلاّدي دخيلك اغسلها اليوم روحك .. انا أشوف الفلم الحين ..
خالد : قومي يالله...
سلامه : خالد الحين بيخلص الفلم .. والله .. حتى شغله وشوف ..
اقتنع خالد .. شغل التلفزيون ويلس عدالهم يتريا ..
وخمس دقايق بالظبط وخلص الفلم ...

خالد : هاااه .. خلاص ارتحتن ...
سلامه + خلود : هييييه
خالد : عيل يالله قومن جدامي ..
سلامه : ويييييييييييين ؟؟
خالد : نغسل السياره ... بعد وين يعني ؟؟
سلامه : انزين .. اغسلها انته واختك .. أنا مالي خص ..
خلود : يالعبيطه .. والله انه وناسه .. جربي ولو يوووووم
خالد : يالله ..
سلامه : اوكيه .. بنشوف هالوناسه كيف ..

الكل سار صوب السياره .. كل واحد قبظله شغله .. اللي يرش الماي واللي يغسل بالاسفنجه واللي يمش ..
كانوا صدق عباله ...

طبعا خالد ... لازم يسوي شيء ولا ما بيرتاح .... عقب ما تأكد أن السياره لمعت من النظافه ..
خالد : سلامه خلود طالعوا شو وراكم ..
وحليلهن البنات على نياتهن .. صدن وراهن .. وشوي إلا ان الماااي طشششششششششش فوقهن ..

هنيه البنات شهقن ..
خالد : خخخخخ حلو الماي لا ...
وبالصدفه وفي ايد سلامه كان في سطل ماي وصابون .. وما قصرت بنت مانع ... جبته على خالد ..
خالد : ايييييييييه .. صاااااااااااااااابون فيه ..
خلود : وامبونه محد مطرشنك تبدا ..
سلامه : برررررررررررررررررررررررررررررررد ... حرام عليك
خالد : عاااااااااادي ..

والكل تم يتضاحك ويسولف ... ودخلوا البيت وتسبحوا ورقدوا .... ورد حمد فليل عالساعه 12 وسيده رقد ...
وعلى الساعه وحده وعشرين دقيقه فليل نشت لطيفه .. وطلعت من الحجره وسارت حجره سهيل ورقدت عداله .. وسهيل انتبه لها .. لحفها عدل ورقدوا ..
انقضى هذا اليوم العادي على خير …

يتبع

ليالي الشوووق · 16-04-2005, 02:07 PM

رووووووووووووعه ويعطيك الف عاافيه

واننتظر التكمله

هوازن · 02:46 PM

العيناوي حمد

من ورايه ؟؟؟

كيف تبدأ بقصه يديده وانت ما خلصت الاولى؟؟؟

عالعموم

تسلم على القصه الغاااويه

ونتريا منك التكمله

تقبل احترااامي

شموخ · 05-06-2005, 06:53 AM

15-04-2005, 04:04 PM

عنبووووووووو ...

وين التكمله حشي مب تكمله هذي والله...

اتريا من متى انااااااا سجلت بس علشاان ادافن وياك يا انته يالقصه ..

لاا تخاااااااااااااف ههههههههههههههههههه ..

سوري والله بس من متي وانته مب راضي تكملهااااااا ..

روعه والله .. ونبي البقيه ..

بنوتتكم ..

شمــــوخ ..

العيناوي حمد · 18-06-2005, 12:04 AM

تسلمن ....

قلت محد شجعني ؟؟

بس وعد اول ما اخلصها بنزلها كامله

احسن لكم ولي

الدلوعهـ · 18-06-2005, 06:09 AM

*·~-.¸¸,.-~*السلام عليكم ورحمة الله وبركاته *·~-.¸¸,.-~*

تسلم اخويه ع القصة الروووووووعة
بس وين التكملة مب حلوة جذيه تعلقنا بين السماء و الارض ونحن نقول وين التكملة
هههههههههههههههه

[fot1]
السموحـــــــ الدلوعة ــــــــــة[/fot1]

شموخ · 21-06-2005, 12:53 AM

يامرحباااااا السااااع مرحب ملايين

منور القصه اخوي حمد توا ما نورت الصفحه

<<<<<< جن القصه قصتي

وانا من متي اتريا يحليلي

اويييييييه نسيت مبروووووووك فوز العين يستااااهلوا والله

يالله علشان الفوز خلص القصه بسرعه هههههههههههههههههه

حلاااااوة الفوز هذي

نترياااااااااااااااااااك بس لاا تتاخر علينااااااااااا

بنوتتكم ..

شموخ ..

Darkness · 21-06-2005, 02:26 AM

السلااام عليكم

اشحالك اخوي

تدري والله انا متى في المنتدى و لا مرة قراءة شىء من اللي كتبته

هذي اول مرة.. و بصراحة اعجبت

شجعتني عشان اقراء كل شىء كنت كاتبنه من قصص سابقة

تسلم تسلم

احب هذا النمط من القصص

يالله شد الهمه و اكتب التكمله

والسموحــــــ منك ــــــة

العيناوي حمد · 25-06-2005, 02:12 AM

داركنس ... شموخ ...دلوعه

تسلمن الغوالي ..والله انكن تشجعن الواحد

وانا ما سويت هالشيء الا لمصلحتكم

واانا احاول حاليا اخلصهااا

ادعولي

حمد

Darkness · 25-06-2005, 10:09 AM

آآآآآآآآآآآآآآآآآآآآآآآآآآمين

بس ياويلك ما تخلصه

روابـــــــط وديـــــــان الإمـــــــــــارات المهمــــــــــــة
القرآن الكريم بأصوات المشايخ
عبدالباسط عبدالصمد	أحمد العجمي	ماهر المعيقلي	مشاري العفاسي
سعد الغامدي	سعود الشريم		عبدالرحمن السديدس

أناشيد إسلاميــــــــــــــــــــــــــــة
الأناشيــــــــــــــــــــــد

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
دروس فوتوشوب -صوره و صوت	ولد الامارات	برامج الرسم والتصميم وشروحاتها	14	21-07-2006 09:43 PM

الذين يشاهدون محتوى الموضوع الآن : 1 ( الأعضاء 0 والزوار 1)